Sowat 15 000 historiese .303-patrone, met ’n geraamde waarde van R7 miljoen, is in De Aar in die Noord-Kaap ontdek.
Munisipale werkers het op 6 Oktober naby Malay Camp in Sunrise, De Aar, op kratte met ammunisie afgekom en die owerhede daarvan in kennis gestel.
Volgens die polisie is die ammunisie as .303-patrone geïdentifiseer en word vermoed dat dit uit die Anglo-Boereoorlog dateer.
’n Multidissiplinêre span, bestaande uit lede van die Plaaslike Kriminele Rekordsentrum, die plofstofeenheid, K9-eenheid en Sunrise-speurders, is na die toneel ontplooi.
’n Ondersoek is daarna van stapel gestuur om die omstandighede rondom die ontdekking verder te ondersoek. Militêre personeel het op 9 Oktober gehelp om die ammunisie veilig van die toneel te verwyder. Die omliggende gebied is intussen veilig verklaar.
Die polisie het lede van die publiek gewaarsku om nie aan vermeende ammunisie of plofbare materiaal te raak of daarmee te peuter wanneer dit ontdek word nie. Sulke voorwerpe moet onmiddellik by die polisie aangemeld word.
Die ondersoek na die omstandighede rondom die ontdekking duur voort.
