Die Parlement se Portefeuljekomitee oor Internasionale Betrekkinge en Samewerking het teruggeslaan nadat Lex Libertas senior ANC-leiers gekritiseer het oor voorstelle om op te tree teen Suid-Afrikaners en organisasies wat buitelandse regerings oor plaaslike sake nader.
Volgens Lex Libertas hou dié voorstelle verband met uitlatings deur komiteevoorsitter Supra Mahumapelo en breër steun van minister van internasionale betrekkinge Ronald Lamola vir optrede teen mense en organisasies wat volgens die regering waninligting oor Suid-Afrika in die buiteland versprei.
Mahumapelo het egter gesê die komitee probeer nie mense stilmaak omdat hulle van die regering verskil nie.
Volgens hom het niemand in die komitee voorgestel dat iemand bloot oor ’n ander politieke standpunt van sy burgerskap ontneem moet word nie. Hy sê die vraag is eerder hoe Suid-Afrika moet reageer wanneer private organisasies buitelandse regerings nader op ’n manier wat tot visumbeperkings, ekonomiese druk of ander maatreëls teen die land kan lei.
Mahumapelo het gesê dit is ’n geldige beleidsvraag wat die Parlement ingevolge sy grondwetlike toesigrol mag ondersoek.
Hy het Lex Libertas ook uitgedaag om sy bewerings oor onder meer plaasaanvalle, eiendomsreg en transformasiewetgewing in die openbaar en onder eed voor die Parlement te stel. “As iemand bewyse van oortredings deur die regering het, bring dit na die Parlement. Bring dit na die hof. Bring dit na die Hoofstuk 9-instellings,” het hy gesê.
Die komitee het ook bewerings van ’n staatsgesteunde wit volksmoord en staatsgoedgekeurde plaasaanvalle verwerp. Dit het verder ontken dat die Onteieningswet arbitrêre grondbeslaglegging sonder vergoeding of geregtelike toesig moontlik maak.
Volgens Mahumapelo verander die aard van die saak wanneer sulke bewerings in die buiteland gebruik word om visumbeperkings, handelsboetes of die onttrekking van hulp teen Suid-Afrika te probeer bewerkstellig.
Hy het ’n onderskeid getref tussen kritiek op die regering en pogings om strafmaatreëls deur die buiteland teen Suid-Afrika te mobiliseer. “Om die regering te kritiseer omdat jy Suid-Afrika liefhet, is patrioties. Om buitelandse straf teen Suid-Afrika te probeer bewerkstellig omdat jy nie van die regering hou nie, is iets anders,” het hy gesê.
Mahumapelo het ook teruggekap teen Lex Libertas se beskuldiging dat die Parlement kritici probeer intimideer.
“Ons sal niemand dreig nie, maar ons sal ook nie geïntimideer word om ons toesigrol prys te gee nie,” het hy gesê.
Hy het bygevoeg dat beskuldigings van dreigemente die Parlement nie sal stilmaak nie en dat die komitee sal voortgaan om Suid-Afrika se verhouding met die VSA, die land se soewereiniteit en grondwetlike orde te ondersoek en te beskerm.
Mahumapelo het vroeër organisasies soos Lex Libertas by die naam genoem en voorgestel dat hul internasionale skakeling moontlik tot ernstige gevolge kan lei. Mahumapelo betwis egter die interpretasie dat hy bloot weens politieke menings burgerskap wou laat ontneem.
