Vandag se belangrikste nuus in ‘n oogopslag

President Cyril Ramaphosa is ongelukkig dat die parlement nog nie daarin geslaag het om lede aan te stel vir die Nasionale Raad vir Geslagsgebaseerde Geweld nie. Huisvoorsitter Cedric Frolick het dadelik opdrag gegee dat die 13 poste geadverteer moet word. Die raad, wat verlede jaar deur wetgewing tot stand gekom het, is daar om leiding te bied oor die voorkoming en hantering van geslagsgebaseerde geweld en vrouemoord. Volgens die wet moet sewe lede uit die burgerlike samelewing kom, en minstens tagtig persent van die raad moet vroue wees.

Die nasionale polisiekommissaris, generaal Fannie Masemola, gaan vandag voort met sy getuienis by die Madlanga-kommissie. Hy het reeds aan die kommissie verduidelik dat hy minister Senzo Mchunu ingelig het oor beweerde bande tussen luitenant-generaal Shadrack Sibiya en misdadigers. Masemola beweer hy het inligting gekry wat Sibiya verbind met die verdagte Vusumuzi Matlala. Die kommissie se taak is om vas te stel of polisiebeamptes en politici saam met misdadigers werk.

Operasie Dudula sê dit gaan nie sy veldtog teen buitelanders by openbare gesondheidsfasiliteite stop nie. Die aankondiging volg nadat ’n kind in Alexandra dood is toe sy ma by ’n kliniek weggewys is. Die Gautengse regering het die groep daarvoor gekritiseer, maar Dudula hou vol dat hulle gaan aanhou.

Die DA in die Oos-Kaap het kommer uitgespreek oor die swak lugkapasiteit van die polisie in die provinsie. Die LUR vir Gemeenskapsveiligheid, Xolile Nqatha, het onthul dat net een van vier helikopters operasioneel is. Daar is net twee helikoptervlieëniers in diens in plaas van die nodige agt, en net vyf van die 77 hommeltuie is bruikbaar. Die DA se Yusuf Cassim vra dat daar ’n herstelplan met duidelike tydlyne opgestel word en dat daar maandeliks oor die vordering verslag gedoen word.

Build One South Africa, onder leiding van Mmusi Maimane, het ’n plan aangekondig om die land se ekonomie te laat groei. Hulle teiken is ’n vyf persent jaarlikse groei, in teenstelling met die huidige een persent. Volgens Maimane moet dit eenvoudig wees vir mense om klein ondernemings te begin en so werkskepping en groei aan te dryf.

Die president van die Demokratiese Republiek van die Kongo, Felix Tshisekedi, sê Rwanda keer vrede in sy land. Hy beweer Rwanda ondersteun steeds die M23-rebelle in die ooste van die land, al ontken Rwanda dit. Tshisekedi sê Rwandese troepe is steeds teenwoordig en help die rebelle, ten spyte van ontkennings dat hulle onttrek het.

In die vroue-eendagreeks het Pakistan die laaste wedstryd in Lahore gewen met ses paaltjies. Links-draai bouler Nashra Sandhu het met ’n uitstaande prestasie van ses paaltjies vir 24 lopies Suid-Afrika beperk tot 115. Dit was die span se swakste kolfvertoning van die reeks, maar hulle het steeds die reeks 2–1 gewen. Tazmin Brits is aangewys as speler van die reeks, terwyl kaptein Laura Wolvaardt erken dat die kolfwerk ’n bekommernis is voor die Wêreldbeker.

Goud verhandel teen $3 755,95 per fynons, terwyl Brent-ruolie $66,13 per vat kos. Die rand staan op R17,30 teen die dollar, R20,49 teen die euro en R23,47 teen die pond. Bitcoin se waarde is $112 168,22.