President Cyril Ramaphosa het die verslag ontvang van die onafhanklike paneel wat ondersoek ingestel het na Iran se deelname aan die vlootoefening Will for Peace 2026.
Die ondersoek is in Februarie ingestel nadat dit geblyk het dat Ramaphosa se opdrag dat die Iranse vloot nie meer aan die Chinese-geleide oefening moes deelneem nie, nie nagekom is nie.
Iran het drie oorlogskepe na Valsbaai gestuur. Hoewel daar aanvanklik berigte was dat Iran se deelname tot waarnemerstatus beperk sou word, het minstens een Iranse oorlogskip uiteindelik aan die seefase van die oefening deelgeneem.
Die paneel is deur afgetrede regter Bernard Ngoepe gelei. Die ondersoek moes vasstel wat tydens die oefening gebeur het, waarom die president se opdrag nie uitgevoer is nie, wie daarvoor verantwoordelik was en watter gevolge daar behoort te wees.
Die ondersoek sou aanvanklik binne een maand afgehandel word, maar die paneel het later meer tyd gevra om sy werk te voltooi.
Volgens die Presidensie het Ramaphosa nou die verslag ontvang en sal hy die bevindings en aanbevelings oorweeg.
Die inhoud daarvan sal egter nie openbaar gemaak word nie. Die Presidensie sê die paneel se werk en verslag bly vertroulik weens nasionale veiligheidskwessies.
Dit beteken dat besonderhede oor moontlike aanspreeklikheid en enige tekortkominge in die bevelstruktuur vir eers nie bekend sal wees nie.
Die oefening het vroeër vanjaar ook diplomatieke spanning veroorsaak, veral nadat die Amerikaanse ambassade kritiek op Iran se betrokkenheid uitgespreek het.
Ramaphosa sal nou die bevindings en aanbevelings oorweeg en besluit watter verdere stappe nodig is.
