Honderde passasiers van die Amerikaanse passasierskip MV Odyssey moes in Kambodja van boord gaan nadat die skip se wêreldreis weens skerp stygende brandstofkoste opgeskort is.
Die skip, wat deur die Florida-maatskappy Villa Vie Residences bedryf word, het Vrydag by Sihanoukville aangekom. Volgens die maatskappy het die maandelikse brandstofkoste per kajuit, wat voorheen gemiddeld sowat $1 800 beloop het, in dele van Asië tot tussen $6 000 en $8 000 gestyg.
Villa Vie Residences sê die skip is stadiger laat vaar en langer in hawens gehou om brandstof te bespaar, maar dat dié maatreëls nie genoeg was om die hoër koste te verreken nie.
Die maatskappy het gesê hy kon nie langer die bedryfsverliese dra nie en dat dit ook nie realisties sou wees om die volle styging in brandstofkoste aan inwoners deur te gee nie.
Daar is intussen ook bekend gemaak dat Villa Vie Residences beplan om in die VSA om Chapter 11-bankrotskapbeskerming aansoek te doen nadat die maatskappy se geld opgeraak het.
Die brandstofkrisis hou verband met beperkte verkeer deur die Straat van Hormuz sedert die oorlog tussen die VSA, Israel en Iran uitgebreek het. Dit het petroleumvoorraad onder druk geplaas en brandstofpryse veral in Suidoos-Asië laat styg.
Volgens Kambodjaanse owerhede was daar 203 passasiers, meestal Amerikaners, en 156 bemanningslede aan boord.
Sommige passasiers sê hulle het slegs sowat sewe uur kennis gekry om hul besittings te pak en die skip te verlaat. Verskeie van hulle moes daarna self verblyf in Sihanoukville reël.
Paul en Lynn Montoya, ’n afgetrede egpaar van Wyoming in die VSA, het sowat 17 maande gelede aan boord gegaan met die verwagting dat hulle vir jare op die skip sou woon.
Hulle sê daar was reeds voor die jongste krisis probleme met veranderende roetes, onbetroubare internetverbinding en verswakkende kosgehalte. Lynn Montoya het ook beweer dat passasiers gereeld gevra is om bykomende geld vir brandstof en ander uitgawes te betaal.
Nie alle passasiers het egter die projek afgeskryf nie. Carol Larson (69), wat haar kajuit vir $120 000 in paaiemente gekoop het, sê sy is nie spyt dat sy deel van die eksperiment met langtermynverblyf op ’n passasierskip was nie.
Ander inwoners hoop steeds dat ’n nuwe maatskappy of ’n inwonersgedrewe poging die projek kan red.
Die MV Odyssey het in Oktober 2024 vanaf Belfast in Noord-Ierland vertrek op ’n reis wat oorspronklik drie en ’n half jaar sou duur. Die skip is in 1993 gebou en is in 2023 deur Villa Vie Residences gekoop.
Kajuite is as langtermynwoonplekke bemark, met sekere lewenslange verblyfopsies wat aanvanklik vanaf sowat $230 000 aangebied is.
Kambodjaanse owerhede het gesê die skip sal na verwagting brandstof inneem en moontlik Saterdag vertrek, maar die operateur het nog nie ’n nuwe vertrekdatum bevestig nie.
