Die polisie in die Wes-Kaap het hierdie week ’n grootskaalse soektog van stapel gestuur nadat ses beskuldigdes Maandag uit die Wynberg-landdroshof se aanhoudingselle ontsnap het. Teen Donderdag is vier van hulle weer aangekeer, terwyl twee steeds op vrye voet is.
Volgens polisiewoordvoerder, sers. Wesley Twigg, het Linda Soyeza homself aan die owerhede oorgegee, terwyl Toufieq Damon in Grassy Park op die Kaapse Vlakte in hegtenis geneem is. Die eerste twee ontsnaptes is reeds Maandagaand, kort ná die voorval, vasgetrek.
Die omstandighede rondom die ontsnapping word nog ondersoek. Die polisie volg leidrade op in ’n poging om die oorblywende twee voortvlugtiges, Mphumelelo Lufutha en Ismail George, op te spoor.
Die ses beskuldigdes het Maandag in die hof verskyn op aanklagte van die besit van onwettige vuurwapens en huisbraak. Ná hul verskyning is hulle teruggeneem na die aanhoudingselle, waarvandaan hulle daarin geslaag het om te ontsnap.
Die polisie doen ’n beroep op die publiek om enige inligting oor die twee voortvlugtiges aan te meld.
