‘n Vrou beweer dat sy jare lank deur Jeffrey Epstein gemanipuleer, beheer en seksueel misbruik is nadat hy haar met beloftes van werk gewerf en daarna stelselmatig uitgebuit het.
Die vrou, wat slegs as Anya geïdentifiseer word om haar identiteit te beskerm, sê sy was een van sowat ‘n dosyn sogenaamde “assistente” wat in woonstelle van Epstein in Manhattan gehuisves is. Volgens haar is hulle feitlik deurentyd tot sy beskikking gehou en gereeld seksueel misbruik.
Volgens Anya het Epstein sy organisasie as “‘n kultus” beskryf waarin hy die leier was.
Anya vertel dat sy as jong model uit Rusland na Wes-Europa verhuis het voordat die modelverkenner Daniel Siad haar aan Epstein voorgestel het. Hy het haar glo belowe dat hy haar loopbaan in die modebedryf sou bevorder en haar aan invloedryke mense sou voorstel. Siad het voorheen ontken dat hy geweet het van die gevaar wat Epstein vir vroue ingehou het.
Volgens haar het Epstein oor maande heen haar vertroue gewen deur belangstelling in haar persoonlike lewe te toon en haar te oortuig dat hy haar wou help. Hy het haar ook glo aangemoedig om haar voorkoms te verander en voortdurend kritiek op haar liggaam gelewer.
Anya beweer Epstein het haar later na Palm Beach in Florida genooi, waar hy destyds ‘n vonnis uitgedien het wat hom onder meer dagvrylating toegestaan het. Daar, sê sy, het hy haar vir die eerste keer seksueel aangerand.
Volgens Anya het Epstein daarna feitlik elke aspek van haar lewe beheer. Sy sê hy het haar finansieel afhanklik gemaak, haar bewegings gemonitor, bepaal met wie sy kontak mag hê en haar gereeld verneder. Volgens haar het hy haar ook gedwing om onnodige operasies te ondergaan om haar voorkoms te verander.
Nog ‘n voormalige assistent, Sarah Kellen, het vroeër vanjaar aan ‘n Amerikaanse kongreskomitee gesê Epstein het vroue só afhanklik van hom gemaak dat hulle hul vermoë verloor het om self besluite te neem.
Kenners sê volwassenes kan, net soos kinders, deur sogenaamde grooming en dwangbeheer in uitbuitende verhoudings vasgevang word.
Volgens Anya moes elke assistent ook nuwe jong vroue werf, wat volgens haar deel van ‘n groter stelsel van uitbuiting was. Sy sê Epstein het die vroue teen mekaar afgespeel, kompromitterende materiaal oor hulle versamel en hulle gedwing om dankbriewe aan hom te skryf, wat volgens haar nog ‘n vorm van beheer was.
Anya sê sy het besluit om nou haar verhaal te vertel om ander slagoffers te help verstaan hoe manipulasie en dwangbeheer oor lang tydperke kan ontwikkel en waarom dit vir slagoffers dikwels moeilik is om uit sulke verhoudings te ontsnap.
Epstein is in 2008 skuldig bevind aan die seksuele misbruik van ‘n minderjarige en is in 2019 weer in hegtenis geneem op federale aanklagte van sekshandel. Hy is in Augustus 2019 dood in sy tronksel aangetref. Hoewel sy dood tot uitgebreide openbare spekulasie gelei het, het die amptelike ondersoek tot die gevolgtrekking gekom dat hy selfdood gepleeg het.