Gerda Steyn het Saterdag haar naam nóg dieper in die geskiedenis van die Twee Oseane-marathon ingegraveer deur vir die sewende agtereenvolgende keer die 56 km-wedloop in Kaapstad te wen.
Steyn, wat reeds as een van Suid-Afrika se grootste langafstandatlete beskou word, het weereens haar staal gewys toe sy die wedloop oortuigend beheer het. Sy het kort ná die maratonmerk van haar naaste teenstander, Margaret Jepchumba, weggebreek en daarna die voorsprong stelselmatig uitgebou.
Met haar kenmerkende ritme en uithouvermoë het Steyn sonder moeite eerste oor die eindstreep gegaan en haar status as die onbetwiste koningin van die Twee Oseane bevestig.
