’n Groep gemaskerde diewe het na bewering sowat 30 000 bottels van Italië se gesogste wyn by ’n bekende wynlandgoed in Toskane gesteel in ’n rooftog wat reeds met die film Ocean’s Eleven vergelyk word.
Die buit, wat na raming sowat €5 miljoen oftewel ongeveer R92 miljoen werd is, is by die Marchesi Antinori-wynmakery naby Cortona gesteel.
Volgens berigte was minstens sewe gemaskerde diewe by die rooftog betrokke. Hulle het glo die landgoed se alarm- en toesigstelsels gedeaktiveer, met twee vragmotors opgedaag en selfs die wynmakery se eie vurkhysers gebruik om die wyn te laai.
Die omvang en presiese tydsberekening van die rooftog het vinnig vrae laat ontstaan oor hoe die groep geweet het wanneer om toe te slaan.
Die gesteelde wyn was reeds saamgepak en gereed vir uitvoer, wat spekulasie oor moontlike binnekennis laat ontstaan het. Daar is egter nog nie vasgestel dat ’n binnepersoon betrokke was nie.
Onder die gesteelde wyn is glo van Italië se bekendste etikette, waaronder Solaia, Tignanello en Guado al Tasso.
Al die gesteelde bottels was uit die 2023-oesjaar, wat as ’n besonder goeie wynjaar in Toskane beskryf is.
Die omvang van die buit laat egter nog ’n groot vraag: wat doen ’n mens met 30 000 bottels gesteelde luukse wyn?
Die herkoms van sulke wyn vorm ’n belangrike deel van die waarde daarvan, wat dit moeilik kan maak om so ’n groot hoeveelheid te verkoop sonder om aandag te trek.
Daar is ook bespiegel dat die bottels moontlik heretiketteer kan word, hoewel die waarde van dié wyne juis grootliks aan die bekende handelsname gekoppel is.
Die wynmakery het kopers gewaarsku om versigtig te wees indien die gesteelde wyn buite amptelike verkoopskanale aangebied word.
Daar is selfs bespiegel of die rooftog moontlik deel van ’n versekeringsbedrogspul kon wees. Dié moontlikheid word egter bevraagteken omdat die wynmakery glo slegs sowat 10% van die waarde van die gesteelde wyn deur versekering sou kon verhaal.
Die rooftog is volgens berigte die grootste wynroof in Italië se geskiedenis volgens waarde.
