Pres. Donald Trump het Maandag sy G20-voorsitterskap afgetrap deur alle inhoud wat Suid-Afrika op die amptelike G20-webwerf gelaai het, te verwyder. Die webtuiste bevat nou net ’n landingsblad met ’n swart-wit foto van Trump en die woorde: “Miami 2026. The best is yet to come”.
Trump het reeds ná verlede maand se G20-beraad in Johannesburg die Suid-Afrikaanse regering gekritiseer oor sy behandeling van die wit minderheid, en het Amerikaanse deelname destyds geweier. Hy het Maandag bevestig dat Suid-Afrika nie na volgende jaar se G20-beraad in Florida genooi sal word nie, wat die eerste uitsluiting van ’n lidland in byna twintig jaar sal wees.
Die Trump-administrasie het verder Suid-Afrika se voorgestelde G20-agenda verwerp, wat gefokus het op ’n “regverdige energie-oorgang” en skuldvolhoubaarheid. Volgens die Amerikaanse departement van buitelandse sake wil Trump eerder die G20 teruglei na kernpunte soos ekonomiese groei, voorspoed en innovasie, met prioriteite wat onder meer regulatoriese verligting en die ontsluiting van veilige energievoorsieningskettings insluit.
Trump het ook weer sy omstrede bewerings van volksmoord op die wit Afrikanergemeenskap in Suid-Afrika herhaal. Die Suid-Afrikaanse regering ontken enige sistemiese veldtog teen minderhede in die land en beskuldig Trump daarvan dat hy politieke spanning tussen die twee lande vererger.
