Honderde supermarkte in Frankryk is deur ’n kuberaanval getref nadat kuberkrakers beheer oor hul verkoelingstelsels gekry en yskaste en vrieskaste laat warm word het.

By sommige winkels het die temperatuur glo oornag tot sowat 50 °C gestyg, met die gevolg dat groot hoeveelhede vars en bevrore kos weggegooi moes word.

Meer as 100 Coopérative U-winkels is geraak, terwyl minstens 300 Intermarché- en Netto-winkels volgens latere berigte ook getref is. Nog sowat 100 winkels is uit voorsorg van die internet ontkoppel. Carrefour, Monoprix en E.Leclerc is ook deur die aanval geraak.

Die kuberkrakers het toegang gekry tot verkoelingstelsels van die Deense maatskappy Danfoss, wat winkels gebruik om yskaste en vrieskaste op afstand te beheer.

Vrieskaste gaan normaalweg snags vir ’n kort tyd deur ’n ontdooiingsiklus waarin die temperatuur effens styg. In dié geval is die stelsels egter so gemanipuleer dat die temperatuur veel hoër gestyg en vir ure so gebly het.

Danfoss het gesê die geraakte stelsels was ouer modelle wat nie meer met die jongste sekuriteitsopdaterings beskerm kon word nie.

Carrefour het bevestig dat 80 van sy winkels geraak is, terwyl Monoprix gesê het ongeveer 5% van sy winkels deur die aanval getref is. Intermarché het gesê sommige van sy yskaste en vrieskaste het vir sowat ses uur lank tot 50 °C verhit. Kos wat moontlik onveilig geword het, is weggegooi.

Bestuurders wat Maandagoggend by verskeie winkels opgedaag het, het glo warm lug uit die vrieskaste gevoel. In sommige winkels het selfs klein brande ontstaan. By een winkel het ’n vrieskas ’n temperatuur van 26,5 °C gewys.

Twee supermarkte in die Elsas-streek alleen het saam verliese van sowat €270 000 aangemeld. Die totale skade in Frankryk kan dus in die miljoene euro’s beloop.

Die Paryse aanklaerskantoor het intussen ’n kubermisdaadondersoek na die aanval begin. Europa se voedselkommissaris, Christophe Hansen, het die aanval veroordeel en gewaarsku dat voedselveiligheid al hoe meer aandag verg.

Dominique Schelcher, uitvoerende hoof van Coopérative U, het gesê personeel werk saam met verkoelingspesialiste om die geraakte stelsels so vinnig moontlik weer aan die gang te kry. Hy het ook ’n ondersoek geëis en gesê dit is onaanvaarbaar om toerusting te teiken wat noodsaaklik is vir Frankryk se voedselvoorsiening.