Johannesburg se burgemeesterskandidaat, Helen Zille, se veldtog wek toenemende kritiek dat dit eerder op sensasie as op werklike oplossings fokus.
Zille gebruik sosiale media en humor om die stad se ernstige probleme – soos slaggate, swak dienslewering, ’n waterlekkoers van byna 50% en ’n leë stadskas – onder die aandag te bring. Haar veldtog het egter opslae gemaak vir video’s waarin sy onder meer in ’n verwaarloosde swembad “visvang” en in ’n watergevulde sloot in Douglasdale swem.
Die sloot, wat drie jaar gelede gegrawe is om ’n gebarste waterpyp te herstel, is herhaaldelik net gesweis eerder as vervang. Inwoners het lank gekla, maar eers ná Zille se video het Johannesburg Water binne 24 uur opgetree. Burgemeester Dada Morero het self erken dit is ’n ou probleem wat vinnig ná haar besoek aangespreek is.
Zille sê moderne veldtogte moet op digitale platforms fokus en dat haar span doelbewus inhoud skep wat mense betrek sonder om hulle te verveel.
MMC vir Vervoer, Kenny Kunene, het haar optrede as onhigiënies beskryf en gesê sy verstaan nie die stad se werking nie.
Ten spyte van die herstelwerk het die betrokke pyp kort daarna weer gebars – ’n aanduiding dat die onderliggende probleem steeds nie behoorlik opgelos is nie.
