Vandag, 30 September, se belangrikste nuus in ‘n neutedop

Seinblokkering in gevangenisse

Die nasionale kommissaris van die Departement van Korrektiewe Dienste, Makgothi Samuel Thobakgale, het ’n voorstel ondersteun om selfoonseine in gevangenisse te blokkeer. Die Stad Kaapstad het die voorstel gemaak vir die Pollsmoor-gevangenis en beweer dat misdadigers misdaad van binne die tronk af organiseer. Die South African Prisoner Organisation for Human Rights kritiseer die plan en meen dit skend gevangenes se regte. Thobakgale sê egter dat ander lande reeds soortgelyke seinblokkeringstelsels gebruik.

Finansiële druk weens immigrasie

Die minister van Finansies, Enoch Godongwana, het sy kommer uitgespreek oor die bekostigbaarheid van gratis dienste aan ongedokumenteerde buitelanders. Hy het tydens ’n vergadering met burgemeesters gesê dat immigrasie en verstedeliking groot druk op stede plaas, veral in Gauteng. Godongwana beklemtoon dat munisipaliteite nie dienste soos gesondheidsorg kan weier nie, maar dat bronne oorlaai word. Hy meen immigrasie moet wettig plaasvind en wys daarop dat die grondwet nie vandag se realiteite voldoende in ag neem nie.

Groot polisie-optrede

Die polisie het die afgelope week meer as 17 000 verdagtes regoor die land in hegtenis geneem. Onder hulle was 196 vir moord, insluitend 63 gesoekte verdagtes. Gauteng het 41 van die moordarrestasies aangeteken, gevolg deur die Oos-Kaap met 40. Beamptes het ook 123 ongelisensieerde vuurwapens gekonfiskeer. Polisiewoordvoerder luitenant-kolonel Amanda van Wyk sê die polisie sal hul pogings om misdaad landwyd te bekamp, voortsit.

Ondersoek na konstabels se dood

Die polisie ondersoek steeds die dood van drie konstabels wie se voertuig vroeër vanjaar in die Hennopsrivier gevind is.
Konstabels Keamogetswe Buys, Boipelo Senoge en Cebekhulu Linda is dae tevore as vermis aangemeld. Hoewel ongeluksverslae reeds ingedien is, wag die ondersoekspan nog op toksikologie- en histologie-uitslae. Brigadier Athlenda Mathe sê die ondersoek vorder en die polisie is verbind tot ’n geloofwaardige uitkoms.

Rand versterk, maar met voorbehoud

Die rand het vanjaar versterk tot sowat R17,20 teen die Amerikaanse dollar – die sterkste vlak in bykans ’n jaar.
Volgens Investec se hoofekonoom, Annabel Bishop, is dit hoofsaaklik te danke aan ’n swakker dollar en nie plaaslike verbeterings nie. Die rand het intussen verswak teenoor die euro en skaars beweeg teenoor die pond. President Cyril Ramaphosa se besoek aan die VSA het ook geen hupstoot gegee nie, te midde van nuwe tariewe en onsekerheid oor die Agoa-ooreenkoms wat waarskynlik verval.

Internasionale nuus: Madagaskar

Madagaskar se president, Andry Rajoelina, het sy regering ontbind ná dae van jeug-geleide protesoptogte teen krag- en watertekorte. Die sogenaamde Gen Z-beweging het duisende mense in agt stede gemobiliseer. Volgens die VN is minstens 22 mense dood en 100 beseer nadat veiligheidsmagte rubberkoeëls, traangas en selfs lewende ammunisie gebruik het. Rajoelina het om verskoning gevra en gesê nuwe leiers sal binnekort aangestel word.

Sport: Bafana Bafana-sanksie

Fifa se Dissiplinêre Komitee het beslis dat Suid-Afrika hul Wêreldbeker-kwalifiseerder teen Lesotho moet verbeur weens die gebruik van ’n ongeskikte speler, Teboho Mokoena. Die wedstryd van 21 Maart is met 3–0 aan Lesotho toegeken. Safa is ook met R216 500 beboet, terwyl Mokoena slegs ’n waarskuwing ontvang het. Die beslissing plaas Bafana Bafana gelyk op 14 punte met Benin in Groep C. Suid-Afrika moet nou maksimum punte teen Zimbabwe en Rwanda haal en hoop Benin val uit. Safa beskryf die sanksie as ongekend en het aangedui dat hulle gaan appelleer.

Geldsake