Haaie beskik oor verskeie merkwaardige eienskappe wat hulle van die wêreld se suksesvolste seediere maak.
Hier is sewe interessante feite oor haaie:
1. Haaie kan tussen hoeveelhede onderskei
Navorsing toon dat haaie veel slimmer is as wat lank geglo is. Hulle kan verskillende klanke, patrone en geometriese vorms onderskei en onthou.
Studies het ook gewys dat jong grysbamboeshaaie tussen hoeveelhede soos drie en vyf, of vier en sewe, kan onderskei, wat daarop dui dat hulle oor basiese numeriese vermoëns beskik.
2. Sommige haaie reageer beter op jazz as klassieke musiek
Navorsers aan Macquarie-universiteit in Australië het bevind Port Jackson-haaie het geleer om na ‘n spesifieke plek in hul tenk te swem wanneer jazzmusiek gespeel word om kos te ontvang.
Toe klassieke musiek gespeel is, kon die haaie nie dieselfde verband tussen die musiek en die voerplek lê nie.
3. Sommige haaie se eiers broei binne die moeder uit
Nie alle haaie lê eiers nie. By sommige spesies broei die eiers reeds binne die moeder uit voordat die kleintjies lewendig gebore word.
Die stekelhondhaai is een voorbeeld en sy dragtigheid kan tot twee jaar duur.
4. Babahaaie eet mekaar reeds voor geboorte
Sandtierhaaie begin reeds in die baarmoeder om vir oorlewing te veg.
Die wyfie het twee baarmoeders waarin verskeie embrio’s ontwikkel. Die embrio’s voed op hul broers en susters totdat net een oorbly. Daarna voed die oorblywende embrio op onbevrugte eiers wat die moeder aanhou produseer totdat dit gebore word.
5. Haaie vorm langdurige sosiale groepe
Navorsing wys sommige haaie is glad nie eensame jagters nie.
Grysrifhaaie vorm vaste groepe wat vir tot vier jaar saam bly, terwyl jong geelhaaie nuwe vaardighede soos kossoek en roofdiere vermy van mekaar aanleer.
Selfs grootwithaaie is al waargeneem wat sowat 6 000 kilometer saam geswem het sonder om van mekaar te skei.
6. Haaie se vel bestaan uit duisende tandagtige strukture
In plaas van gewone skubbe is haaie se vel met piepklein tandagtige strukture, bekend as dermale dentikels, bedek.
Hierdie oppervlak verminder waterweerstand wanneer hulle swem en voel, wanneer dit in die verkeerde rigting aangeraak word, soos growwe skuurpapier.
7. Haaie kan elektriese impulse waarneem
Benewens hul uitstekende reuk, gehoor en sig beskik haaie oor spesiale sintuie waarmee hulle beweging, drukveranderinge, elektriese impulse en selfs die aarde se magneetveld kan waarneem.
Spesiale organe, bekend as die ampullae van Lorenzini, stel hulle in staat om die elektriese impulse wat deur spierbewegings, insluitend ‘n kloppende hart, opgewek word, op te spoor. Dit help haaie om prooi in volledige duisternis of onder sand op te spoor.
