Die polisie se bomverwyderingseenheid het Vrydagoggend na die Prellerplein-winkelsentrum in Bloemfontein gehaas nadat ’n ontploffing by ’n Woolworths-winkel aangemeld is.
Die voorval volg minder as 24 uur nadat ’n soortgelyke ontploffing by ’n Woolworths-tak in die Menlyn Park-winkelsentrum in Pretoria plaasgevind het.
Spesialislede van die polisie, insluitend die honde-eenheid en bomtegnici, is na die toneel ontbied om die gebied te ondersoek. Beamptes het die winkelsentrum afgesper terwyl hulle die moontlikheid ondersoek dat daar nog ’n ploftoestel op die perseel kan wees.
Die ondersoek was Vrydagoggend steeds aan die gang, maar geen beserings is tot dusver aangemeld nie.
Owerhede het nog nie aangedui of die Bloemfontein-voorval en die ontploffing in Pretoria met mekaar verband hou nie.
Ten spyte van die voorval het die winkelsentrum weer omstreeks 08:00 sy deure vir die publiek oopgemaak terwyl ondersoekers hul werk voortgesit het.
