Die BCVO se SA Nasionale Atletiek vind vandag en more by die De Villiersstadion in Sasolburg plaas waar CVO-skole van regoor Suid-Afrika bymekaarkom vir die jaarlikse Somerspele.
Atlete het oor die seisoen in vier streke meegeding om vir die nasionale byeenkoms te kwalifiseer. Vanjaar neem 28 skole deel en jong atlete kry die geleentheid om hul skole op die baan en veld te verteenwoordig.
Vir baie deelnemers is die dag meer as net sport. Wanneer CVO-skole bymekaarkom, is daar ’n besondere atmosfeer — die soort “hoendervleis”-ervaring wat kom wanneer jong mense saamkom met dieselfde taal, kultuur en waardes. Die dag gaan nie net oor wen nie, maar oor deursettingsvermoë, karakter en span­gees.
Vandag se SA-atletiek beloof dus ’n opwindende dag van sport en samehorigheid te wees waar jong atlete hul beste gee en waar die bande tussen CVO-skole verder versterk word.