“As dit nie ’n plaasaanval is nie, wat is dit?”

’n 60-jarige vrou is Woensdagaand met ernstige kopbeserings in die hospitaal opgeneem nadat sy en haar seun op ’n kleinhoewe in die Andion-omgewing van Pretoria aangeval is.

Die aanval het volgens inligting wat deur Petrus Sitho van die Awareness Walk Stop Farm Killings-veldtog versprei is, op 9 September omstreeks 22:40 in hul huis plaasgevind.

Die vrou is na bewering met ’n graaf en piksteel geslaan. Sy was volgens die inligting in ’n ernstige toestand en het om haar lewe geveg.

Haar seun se arm is glo gebreek terwyl hy sy ma probeer verdedig het. Hy het volgens die weergawe van die voorval uit selfverdediging een van die aanvallers met ’n panga geslaan. Daar word vermoed dat dié aanvaller ook in die hospitaal opgeneem is.

Sitho het die voorval binne die konteks van plaasaanvalle geplaas en gevra: “As dit nie ’n plaasaanval is nie, wat is dit?”

Daar word beplan om die slagoffers te besoek om hul volledige weergawe van die gebeure te bekom.

Geen presiese getal aanvallers is genoem nie. Geen inligting oor moontlike arrestasies of of enigiets tydens die aanval gesteel is, is verstrek nie.