Die Two Oceans-akwariumstigting vra die publiek om nie beseerde of gestrande skilpaaie terug in die see te sit wanneer hulle op die strand uitgespoel word nie.
Die waarskuwing volg nadat ’n gerehabiliteerde karetskilpad, genaamd Kai, onlangs weer in die see vrygelaat is in die De Hoop Marine Beskermde Gebied.
Kai het ses jaar lank rehabilitasie by die akwarium ontvang nadat hy ’n ernstige longinfeksie opgedoen het. Die infeksie het veroorsaak dat een van sy longe permanent groter as die ander gebly het.
Die seeskilpadveearts, Bernice Huyssteen, sê die verskil in longgrootte het Kai se dryfvermoë beïnvloed en dit vir hom moeilik gemaak om normaal te swem en te duik voordat hy herstel het.
Sy het beklemtoon dat skilpaaie wat stil op die strand lê, gewoonlik hulp nodig het.
“Mense probeer help omdat hulle goeie bedoelings het, maar dit is eintlik een van die slegste dinge wat jy kan doen,” het Huyssteen gesê.
“Geen skilpad behoort op die strand te wees nie, tensy dit ’n wyfie is wat besig is om eiers te lê. Enige ander skilpad wat daar uitgespoel het, is waarskynlik beseer of siek.”
