President Cyril Ramaphosa sê daar is niks in die Konstitusionele Hof se uitspraak oor die Phala Phala-saak wat hom dwing om te bedank nie.
Hy het die land toegespreek en duidelik gemaak dat hy nie sy pos gaan verlaat nie, al is daar al hoe meer mense wat vra dat hy moet bedank.
Dit kom nadat die Konstitusionele Hof verlede week beslis het dat die parlement verkeerd opgetree het. Volgens die hof het die parlement in 2022 onwettig opgetree toe hulle ’n proses gestop het wat kon lei tot Ramaphosa se verwydering uit sy amp.
Ramaphosa sê egter die hof het niks teen hom persoonlik bevind nie. Hy beklemtoon dat die uitspraak net oor die parlement se optrede gaan, en nie oor sy eie gedrag nie.
Hy sê ook dat dit verkeerd sou wees om nou te bedank. Volgens hom het hy ’n verantwoordelikheid aanvaar toe hy president geword het, en hy wil dit nie nou laat vaar nie.
Die Phala Phala-saak bly ’n groot politieke kwessie in Suid-Afrika, en die debat oor Ramaphosa se toekoms is nog lank nie verby nie.
