Terwyl groot dele van Suid-Afrika die afgelope week bibber onder sneeu, ysige temperature en kouefronte, worstel groot dele van Europa met die teenoorgestelde probleem. ’n Uiterste hittegolf hou verskeie lande in sy greep, met temperature wat bo 40 °C styg en reeds lewens eis.
In Frankryk is drie mense die afgelope naweek dood nadat hulle aan die hitte blootgestel is. Klimaatkenners sê die rekordtemperature word aangevuur deur mensgemaakte klimaatsverandering.
Byna die helfte van Frankryk se departemente is tans onder die hoogste vlak van hittewaarskuwing. Altesaam 49 van die land se 96 departemente is op rooi gereedheidsvlak geplaas, teenoor 35 oor die naweek.
Die Franse regering het 845 skole Maandag gesluit, terwyl nog 1 800 skole hul leerders vroeër huis toe stuur. Verskeie dorpe het ook hul jaarlikse musiekfeeste gekanselleer, en die gebruik van alkohol in openbare plekke is verbied in gebiede waar die hoogste hittewaarskuwings geld.
Temperature van meer as 40 °C is reeds in dele van Frankryk aangeteken, iets wat ongewoon is vir hierdie tyd van die jaar. In die Gironde-streek in die suidweste van die land is drie mense tussen 80 en 95 jaar oud oorlede, met owerhede wat sê die uiterste hitte het tot hul dood bygedra.
Weerkundiges waarsku dat die huidige hittegolf moontlik net so ernstig kan wees as die ramp van Augustus 2003, toe byna 15 000 mense in Frankryk weens die hitte gesterf het.
Ook België word swaar getref. Die land se spoorwegmaatskappy het spitsuurtreine gekanselleer om te voorkom dat tegniese probleme die spoorverkeer ontwrig. Volgens weerkundiges kan België in die komende week die hoogste temperature in sy geskiedenis beleef.
Frankryk se adjunkminister vir ekologie, Mathieu Lefevre, sê die hittegolf is besonder ongewoon omdat dit nie net baie intens is nie, maar ook baie vroeg in die jaar voorkom. Verskeie Europese lande het reeds in Mei rekordtemperature vir daardie maand aangeteken.
Akshay Deoras van die Universiteit van Reading in Brittanje sê daar is min twyfel oor die oorsaak van die hitte.
Volgens hom het mensgemaakte klimaatsverandering die atmosfeer warmer gemaak, wat veroorsaak dat hittegolwe vandag veel erger is as wat dit in die verlede sou wees.
In Spanje waarsku die land se weerdiens dat temperature tot Woensdag uitermatig hoog sal bly. Sommige gebiede kan temperature van tot 44 °C beleef. Hoewel daar vanaf Donderdag effense afkoeling verwag word, sal die hitte volgens voorspellers steeds baie intens wees.
Die uiterste weerstoestande het selfs openbare byeenkomste geraak. In Madrid is ’n openbare vertoning van Spanje se Wêreldbekerwedstryd teen Saoedi-Arabië gekanselleer omdat die hitte as ’n veiligheidsrisiko beskou is.
Ook Brittanje maak gereed vir rekordtemperature. Liz Bentley, hoof van die Royal Meteorological Society, sê die land se bestaande Junie-hitterekord kan maklik verbreek word.
Volgens haar kan temperature van tussen 38 °C en 39 °C in die komende week voorkom. Die huidige Junie-rekord staan op 35,6 °C.
Sy sê dit beteken dat beide Mei en Junie vanjaar temperature kan oplewer wat die vorige rekords met meer as twee grade Celsius oortref – iets wat nog nooit tevore in Brittanje gebeur het nie.
