Wetenskaplikes waarsku dat neushoringvoëls die jongste slagoffers is van ’n toenemende internasionale handel in wild, wat die voortbestaan van verskeie spesies in Afrika bedreig.
Volgens ’n onlangse verslag wat deur Mongabay gepubliseer is, floreer die onwettige handel in lewende voëls, vere en selfs skedels oor groot dele van die vasteland. Dié handel vind grotendeels onbeheerd plaas en kan, volgens kenners, tot uitwissing van sekere spesies lei.
Mike Bolhuis, private speurder en stigter van Specialised Security Services (SSS), waarsku dat Suid-Afrika nie immuun is nie. “Ons land is die tuiste van verskeie neushoringvoëlspesies, insluitend die bromvoël (Bucorvus leadbeateri), wat reeds binne ons grense as bedreig geklassifiseer word,” sê Bolhuis.
Bolhuis meen dat die onwettige handel moeilik opgespoor word en waarsku dat die bromvoëlbevolking reeds met meer as 50% in sommige provinsies afgeneem het. Hoewel slegs vier wettige gevalle van handel sedert 2014 aangeteken is, glo kenners dat die werklike omvang van smokkelary veel groter is.
Bewaringsgroepe vra dat die publiek, wildbewaarders en voëlkykers enige verdagte aktiwiteit rapporteer, aangesien selfs klein hoeveelhede onwettige handel ’n groot invloed op biodiversiteit kan hê.
Volgens die Wet op Nasionale Omgewingsbestuur kan skuldiges beboet word met tot R10 miljoen of tien jaar tronkstraf.
