Meer as helfte van huisbrake word nie by polisie aangemeld nie

Volgens Statistieke Suid-Afrika (Stats SA) se jongste Governance, Public Safety and Justice Survey het sowat 1,5 miljoen huisbraakvoorvalle gedurende dié tydperk plaasgevind. Net meer as een miljoen huishoudings is daardeur geraak.

Slegs 48,2% van dié voorvalle is egter by die Suid-Afrikaanse Polisiediens (SAPD) aangemeld.

Volgens die kriminoloog dr. Guy Lamb bereik min aangemelde huisbraaksake uiteindelik die hof en lei nog minder tot skuldigbevindings.

Versekering dryf aanmelding

Lamb sê die besluit om ’n huisbraak aan te meld, word uit die publiek se oogpunt grootliks deur versekeringsoorwegings beïnvloed.

Mense wat verseker is en waardevolle besittings verloor het, het ’n praktiese rede om die misdaad aan te meld omdat hulle ’n polisiesaaknommer vir ’n versekeringseis nodig het.

Vir baie ander Suid-Afrikaners kan die aanmelding volgens Lamb bloot as ’n bykomende administratiewe taak beskou word, veral wanneer hulle meen dit is onwaarskynlik dat dit resultate sal oplewer.

Hy waarsku egter dat die versuim om misdaad aan te meld ’n verdere probleem skep.

Polisie kry nie volle prentjie nie

Die polisie steun op aangemelde misdaad om te bepaal waar hulpbronne benodig word. Wanneer misdaad nie aangemeld word nie, weerspieël die statistiek volgens Lamb nie die ware prentjie van misdaad in ’n gebied nie.

Dit kan die toewysing van polisiebeamptes en speurders beïnvloed, asook besluite oor waar nuwe polisiestasies nodig is. Indien misdaad nie aangemeld word nie, word die nodige hulpbronne volgens Lamb nie noodwendig na daardie gebiede toegewys nie.

Hy sê die aanmelding van verskeie soortgelyke huisbrake kan die polisie ook help om ’n reeks voorvalle met dieselfde oortreders te verbind. Dit is veral belangrik wanneer kringtelevisiebeeldmateriaal of ander getuienis ontbreek.

As niemand die voorvalle aanmeld nie, gaan dié sake volgens Lamb nêrens heen nie en kan die oortreders voortgaan om dieselfde soort misdaad te pleeg.