Meta staar ’n swaar finansiële terugslag in die gesig nadat ’n hof in New Mexico beslis het dat die tegnologiereus $375 miljoen moet betaal.
Die uitspraak volg op bevindings dat die maatskappy die publiek verkeerd ingelig het oor hoe veilig sy platforms vir jong gebruikers is. Facebook, Instagram en WhatsApp – almal onder Meta se sambreel – is volgens die hof gebruik op maniere wat kinders aan gevaar blootgestel het, insluitend kontak met seksoortreders en blootstelling aan eksplisiete inhoud.
New Mexico se prokureur-generaal, Raul Torrez, het die uitspraak as baanbrekend beskryf en gesê dit is die eerste keer dat ’n staat daarin slaag om Meta oor kinderveiligheid tot verantwoording te roep.
Meta het egter aangedui dat hy nie die uitspraak aanvaar nie en beplan om dit in ’n hoër hof te betwis. Die maatskappy hou vol dat hy deurlopend werk om gebruikers te beskerm en dat die hantering van skadelike inhoud en kwaadwillige gebruikers ’n komplekse uitdaging bly.
Tydens die verhoor, wat oor sewe weke gestrek het, is interne dokumente en getuienis van voormalige werknemers aan die hof voorgelê. Dit het gewys dat Meta bewus was van die teenwoordigheid van kindermolesteerders op sy platforms.
Een van die sleutelgetuies, voormalige ingenieursbestuurder Arturo Béjar, het verduidelik hoe eksperimente op Instagram gewys het dat minderjariges gereeld aan geseksualiseerde inhoud blootgestel word. Hy het ook getuig dat sy eie dogter deur ’n vreemdeling op die platform vir seks genader is.
Volgens interne data wat in die hof voorgehou is, het 16% van Instagram-gebruikers in ’n enkele week ongewenste naaktheid of seksuele inhoud gesien.
Die hof het bevind dat Meta se optrede neerkom op duisende oortredings van wetgewing, elk met ’n moontlike boete van $5 000, wat tot die totale bedrag van $375 miljoen gelei het.
Meta het daarop gewys dat hy oor die jare verskeie veiligheidsmaatreëls ingestel het, insluitend sogenaamde “Teen Accounts” wat jong gebruikers meer beheer gee, asook nuwe funksies wat ouers waarsku oor potensieel skadelike inhoud.
Intussen duur regsgedinge teen die maatskappy voort. In Los Angeles voer ’n jong vrou aan dat sy as kind verslaaf geraak het aan platforms soos Instagram en YouTube weens hul ontwerp. Daar is tans duisende soortgelyke sake wat deur Amerikaanse howe beweeg.
Die saak in New Mexico spruit uit ’n regsgeding wat in 2023 ingestel is. Die staat het aangevoer dat Meta se algoritmes jong gebruikers aktief na skadelike en eksplisiete inhoud lei, insluitend materiaal wat verband hou met seksuele uitbuiting.
Torrez sê Meta se bestuur was bewus van die risiko’s, maar het waarskuwings geïgnoreer en die publiek nie die volle waarheid vertel nie.
Volgens hom stuur die uitspraak ’n duidelike boodskap dat tegnologiemaatskappye aanspreeklik gehou sal word vir die veiligheid van jong gebruikers.