Dit was ’n aand van geweld op die N3 tussen Heidelberg en Vosloorus, aangesien misdadigers motoriste met enige moontlike middele tot stilstand bring.
Twee voertuie was vanaand (24 Maart) in ongelukke betrokke nadat hulle klippe getref het wat deur misdadigers in die pad geplaas is. Albei voorvalle het op die N3 tussen die R23 Benoni-brug en die Kliplaagte-brug plaasgevind. Een voorval was op die noordelike baan in die rigting van Johannesburg, terwyl die ander op die suidelike baan van die N3 plaasgevind het.
Op die N3 Noord het ’n voertuig die hindernisse getref en gerol, terwyl die bestuurder op die N3 Suid beheer oor die voertuig verloor het en teen ’n wal afgery het nadat hy die klippe getref het. Altesaam vier mense het matige beserings opgedoen en is na plaaslike hospitale geneem vir verdere behandeling.
Daar word verder berig dat nog vier voertuie elders op die snelweg beskadig is. Een persoon beweer dat hy beroof is deur die oortreders toe sy voertuig tot stilstand gekom het. Die ander het daarin geslaag om relatiewe veiligheid by Petroport te bereik.
Heidelberg Volunteer Medics and First Responders, Rensburg Forum, GPG Medical Services en SAPD Zonkezizwe het al die tonele bygewoon.
Motoriste word weereens aangeraai om nie snags alleen op die N3 te ry nie. Waar moontlik, reis in groepe en bly waaksaam.
