Afrika se grootste arend sprei vanjaar sy vlerke op goud en silwer nadat die SA Munt sy volledige 2026 Martial Eagle-versameling bekend gestel het.

Die breëkoparend (Polemaetus bellicosus) staan sentraal in die tweede uitgawe van die SA Munt se sewedelige Odyssey of the Sky-reeks.

Met ’n vlerkspan van meer as twee meter is die breëkoparend ’n indrukwekkende roofvoël. Op die nuwe munte word die arend van naderby met sy vlerke oopgesprei uitgebeeld.

Van goud tot ’n kilogram silwer

Die 2026-versameling bestaan uit sewe munte in goud en silwer, met verskillende groottes vir versamelaars.

Die drie goue munte bestaan uit 24 karaat goud en word in gewigte van ¼ ons, 1 ons en 5 ons aangebied.

Die vier silwermunte bestaan uit 999 fyn silwer en word in gewigte van 1 ons, 2 ons, 5 ons en 1 kg aangebied.

Dit beteken die breëkoparend se ontwerp verskyn op munte wat wissel van ’n kwartons-goudmunt tot ’n silwermunt van 1 kg.

Met die 2026-versameling plaas die SA Munt Afrika se grootste arend in die kollig met ’n ontwerp wat die roofvoël se krag, fokus en presisie beklemtoon.