JOHANNESBURG – Die geskorste adjunkhoof van Misdaadintelligensie, genl.-maj. Feroz Khan, is Sondagaand in ‘n vermoedelik doelgerigte aanval in Houghton geskiet. Die voorval kom slegs enkele dae voordat hy voor die Madlanga-kommissie van ondersoek sou getuig.
Volgens voorlopige inligting het twee onbekende gewapende mans in ‘n wit Mercedes-Benz op Khan losgebrand voordat hulle van die toneel gevlug het.
Ondersoekers het minstens twee doppies op die toneel gevind. Khan is in sy onderlyf geskiet en is na Netcare Milpark-hospitaal gehaas, waar hy in ‘n kritieke toestand behandel word.
Die skietery vind plaas terwyl die Madlanga-kommissie ondersoek instel na bewerings van korrupsie, dwelmdiefstal en die onwettige handel in edelmetale.
Khan sou op 1 Julie voor die kommissie verskyn nadat hy sy hofpogings laat vaar het om sy getuienis te keer en te verhoed dat ondersoekers toegang tot sy elektroniese toestelle kry.
Die Suid-Afrikaanse Polisiediens het die skietery bevestig en ‘n ondersoek van stapel gestuur.
Polisiewoordvoerder brig. Athlenda Mathe het gesê die waarnemende nasionale polisiekommissaris het ook opdrag gegee dat die Taakspan vir Politieke Moorde by die ondersoek ingesluit word om te verseker dat alle moontlike leidrade opgevolg word en die skuldiges aangekeer word.
Sy het egter gewaarsku dat dit te vroeg is om die motief vir die aanval te bepaal.
“Dit is voortydig en onverantwoordelik om oor enige moontlike motief te bespiegel of tot die gevolgtrekking te kom dat die voorval met sy verwagte verskyning voor die kommissie verband hou,” het Mathe gesê.
Die ondersoek duur voort.
