ST. PAUL – Wat begin het as twee afsonderlike tragedies in dieselfde hospitaal, het jare later uitgeloop op ‘n besonderse liefdesverhaal wat nou op ‘n huwelik afstuur.
Zachary Zarembinski en Isabelle Richard, albei van Minnesota in die VSA, het mekaar die eerste keer ontmoet nadat hulle afsonderlik ernstige breinbeserings opgedoen en in medies-geïnduseerde komas geplaas is.
Zarembinski het in 2018 tydens ‘n wedstryd van sy hoërskool se Amerikaanse voetbalspan langs die veld inmekaargesak. Dokters het ‘n traumatiese breinbesering by hom gediagnoseer en hom in ‘n koma geplaas om sy brein kans te gee om te herstel.
Nege dae later het hy wakker geword – omtrent dieselfde tyd toe die 16-jarige Isabelle Richard ná ‘n motorongeluk in dieselfde hospitaal opgeneem en ook in ‘n medies-geïnduseerde koma geplaas is.
Richard se ma het van Zarembinski se vinnige herstel gehoor en hom in die hospitaal besoek in die hoop dat haar dogter ook sou herstel. Die twee families het daarna kontak behou.
Toe Richard maande later uit haar koma ontwaak, het Zarembinski haar besoek. Weens haar beserings kon sy skaars praat en sy onthou vandag nie eens daardie eerste ontmoeting nie.
Daarna het hul paaie vir jare geskei terwyl elkeen op rehabilitasie gefokus het. Zarembinski moes epileptiese aanvalle ná sy breinbesering oorkom, terwyl Richard weer moes leer praat en loop.
Eers in 2024 het Zarembinski weer met Richard in verbinding getree nadat hy ‘n plasing op Facebook oor haar herstel gesien het.
Die twee families het saam geëet en kort daarna het Zarembinski haar vir haar telefoonnommer gevra.
Richard het aanvanklik net vriendskap verwag, maar hulle het ná ‘n paar afsprake verlief geraak.
“Ek weet waardeur sy is,” sê Zarembinski. “Ek sê gereeld vir haar: ‘Ek verstaan. Ek was ook daar.'”
In 2025 het hulle die podsending Hope in Healing begin, waarin hulle hul herstelverhale deel om ander mense moed te gee.
Later dieselfde jaar, tydens ‘n opname by Regions-hospitaal in St. Paul waar albei behandel is, het Zarembinski onverwags op een knie gegaan en Richard gevra om met hom te trou.
Hospitaalpersoneel het die verrassing ondersteun deur ‘n hartvormige vertoning met die woorde “Will you marry me?” gereed te hou.
Amanda Solomon, ‘n verpleegster wat Zarembinski behandel het, beskryf hul verhaal as “soos ‘n sprokie”.
Hoewel albei steeds met geheueverlies saamleef, het hul gesondheid die afgelope jaar aansienlik verbeter. Zarembinski, wat as bestuurder van ‘n Verizon-winkel werk, het sedert Februarie 2025 geen epileptiese aanvalle meer gehad nie. Richard werk as kassier by dieselfde kruidenierswinkel waarheen sy op pad was toe sy as tiener in die motorongeluk betrokke was.
Die paartjie, nou onderskeidelik 25 en 23 jaar oud, beplan om in September in Red Wing, Minnesota, te trou, saam met die familielede en mediese personeel wat hulle gehelp het om te herstel.
