Voertuie word al hoe meer by Suid-Afrika se besigste lughawens agtergelaat, sê Mpho Maluleka van die Lughawemaatskappy van Suid-Afrika (ACSA).
Hy sê lughawepersoneel kan gewoonlik sien wanneer ’n voertuig moontlik verlate is. Hulle let op dinge soos baie stof op die motor, pap bande en hoe lank dit al daar staan.
Parkeerwagte en sekuriteitspanne hou daagliks ’n oog oor die voertuie en meld enige wat verdag lyk. Daarna werk ACSA saam met banke en die polisie om uit te vind wie die eienaar is en of die voertuig dalk gesteel is.
Volgens Maluleka gebeur dit soms dat mense die land verlaat en nooit weer terugkeer nie, en dan bly hul motors by die lughawe agter. In ander gevalle is die voertuie nog onder finansiering, en die banke word gekontak om dit terug te neem.
Hy sê daar is ook gevalle waar mense eers ná meer as ’n jaar terugkom, net om te ontdek hul motor se battery is pap en die parkeerrekening is baie hoog.
“Party mense los hul voertuie vir meer as ’n jaar en kom dan eers terug,” het hy gesê.
Sommige motoriste moes al bykans R80 000 betaal vir parkering voordat hulle met die lughawe oor die bedrag kon onderhandel.
ACSA sê hulle het tans geen wetlike reg om hierdie voertuie oor te neem nie. Die motors bly dus staan terwyl owerhede probeer om die eienaars of betrokke banke op te spoor.
