OKLAHOMA CITY – Die Suid-Afrikaanse MMA-vegter Dricus du Plessis het ná bykans ‘n jaar buite aksie ‘n oortuigende terugkeer tot die UFC gemaak toe hy Kamaru Usman van Nigerië Saterdag met ‘n eenparige puntebeslissing in die hoofgeveg van UFC Fight Night in Oklahoma City verslaan het.
Die beoordelaars het die geveg 50-45, 49-46 en 49-46 in Du Plessis se guns beslis. Dit was sy eerste geveg sedert hy verlede jaar sy middelgewigtitel aan Khamzat Chimaev afgestaan het.
Du Plessis het ná die geveg gesê sy verantwoordelikheid teenoor Suid-Afrikaanse ondersteuners het hom gemotiveer om ná die teleurstelling terug te veg.
“Ek moes weer opstaan. Daar is soveel Suid-Afrikaanse kinders wat na my opkyk. Dit is groter as ek. Ek kan nie tou opgooi nie,” het die 32-jarige gesê.
Die geveg is deurgaans staande gevoer, sonder enige suksesvolle afneem- of voorleggingspogings. Du Plessis het die botoon gevoer en 139 houe teenoor Usman se 99 geland, terwyl hy ook 136 beduidende houe teenoor Usman se 92 aangeteken het.
Met die oorwinning verbeter Du Plessis sy professionele rekord tot 24 oorwinnings en drie nederlae. Hy het sy eerste nege UFC-gevegte gewen en die middelgewigtitel van Januarie 2024 tot middel Augustus 2024 gehou.
Usman, die voormalige UFC-weltergewigkampioen, se rekord staan nou op 21 oorwinnings en vyf nederlae. Die 39-jarige Nigeriër het vier van sy laaste vyf gevegte verloor.
In die medehoofgeveg het Christian Leroy Duncan van Engeland Jared Cannonier met ‘n eenparige puntebeslissing verslaan. Die beoordelaars het die geveg 30-27, 30-27 en 29-28 in Duncan se guns beslis.
