Vandag, 15 Oktober, se belangrikste nuus in ‘n neutedop

Leierskapstryd in die SAPD

Die geskorste adjunk-polisiekommissaris, luitenant-generaal Shadrack Sibiya, beweer daar is tans ’n ernstige leierskapstryd binne die Suid-Afrikaanse Polisiediens. Sibiya het voor die parlement se ad hoc-komitee oor polisiekorrupsie getuig en gesê dat luitenant-generaal Nhlanhla Mkhwanazi se bewerings oor korrupsie spruit uit hierdie interne stryd. Mkhwanazi het vroeër vanjaar beweer dat senior polisiebeamptes en politici met misdadigers saamwerk, ’n verklaring wat groot opspraak verwek het.

ANC kritiseer AfriForum

Die ANC het die burgerregteorganisasie AfriForum skerp gekritiseer oor sy versoek dat die Khampepe-kommissie ook ANC-lede moet ondersoek wat tydens die Waarheids- en Versoeningskommissie met misdrywe verbind is. Volgens die ANC probeer AfriForum die geskiedenis herskryf en ignoreer hulle die verskil tussen bevrydingsdade en die misdade van apartheid. AfriForum voer aan dat daar politieke inmenging was wat sekere ANC-leiers teen vervolging beskerm het, maar die ANC beskryf dié bewerings as propaganda wat daarop gemik is om die erns van apartheid te minimaliseer en die demokrasie te ondermyn.

Protes by Universiteit van die Vrystaat

Die minister van Hoër Onderwys, Buti Manamela, hou die situasie by die Universiteit van die Vrystaat fyn dop nadat protesaksies daar gewelddadig geword het. Die universiteit is tydelik gesluit nadat sekuriteitsbeamptes gister beseer is tydens betogings. Studente protesteer teen die instelling se besluit om voorlopige registrasie vanaf volgende jaar te skrap.
Volgens die nuwe beleid moet studente hul skuld tot onder R30 000 verminder om te registreer. Die departement doen ’n beroep op dialoog en vra dat alle partye geweld vermy.

Meer as 1 400 in hegtenis in Noordwes

Die polisie in Noordwes het tydens grootskaalse misdaadvoorkomingsoperasies meer as 1 450 verdagtes in hegtenis geneem. Die aanklagte wissel van moord, roof en verkragting tot bestuur onder die invloed en onwettige verblyf.
Volgens polisiewoordvoerder brigadier Sabata Mokgwabone is 447 verdagtes reeds deur forensiese DNS-bewyse met misdade verbind. Beamptes het ook verskeie dwelms, drie vuurwapens, ammunisie, voertuie, drank en tabakprodukte gekonfiskeer.

Township-sake sukkel sonder registrasie

’n Nuwe Standard Bank-navorsingsverslag toon dat die meeste besighede in townships nie geregistreer is nie – en gevolglik nie toegang tot finansiering het nie. Volgens die Township Informal Economy Report het slegs nege persent van hierdie ondernemings toegang tot banklenings, terwyl die meerderheid op persoonlike spaargeld of familiehulp staatmaak om aan die gang te bly.

Weermag neem beheer in Madagaskar oor

In internasionale nuus vier inwoners van Madagaskar nadat die weermag beheer oorgeneem het ná weke van betogings teen president Andry Rajoelina. Die stap volg nadat parlementslede gestem het om Rajoelina uit sy amp te verwyder. Volgens berigte het die president uit die land gevlug, terwyl die presidensie die militêre optrede as ’n staatsgreep beskryf.

Krieket: Reën bederf vrouewêreldbekerwedstryd

In sportnuus moes die vroue-Wêreldbekerwedstryd tussen Sri Lanka en Nieu-Seeland in Colombo gestaak word weens swaar reën. Sri Lanka het ’n telling van 258 vir ses behaal, met Nilakshika Silva wat die vinnigste halfeeu van die toernooi geslaan het — 50 lopies van net 26 balle. Kaptein Chamari Athapaththu het ook sterk vertoon met haar 20ste eendagvyftig, maar die wedstryd is afgelas voordat Nieu-Seeland kon kolf.

Geldsake