Johan Barnard sê die dood van sy twee jong seuns, wat binne enkele ure van mekaar op dieselfde dag oorlede is, het hom gebreek.
“Dit is ’n pyn wat ek nooit geweet het ’n mens kan ervaar nie,” het hy gesê.
Sy agtjarige seun, Dean, en sy twee weke oue baba, LJ, is verlede week oorlede nadat hulle albei met ’n longinfeksie in die hospitaal opgeneem is. Die twee seuns is met Shone se kompleks gebore, ’n seldsame aangebore harttoestand.
Barnard het dae lank langs hul beddens gewaak en gebid dat hulle sou herstel, maar sy “klein bulletjies”, soos hy hulle noem, het Donderdag gesterf.
“Dit voel nog onwerklik,” sê hy.
“Vir ons bly dit die Here se wil. Hy het hulle vir ’n tyd lank aan ons toevertrou, en nou het Hy hulle weer kom haal.
“LJ was nog skaars in die wêreld, maar hy het reeds ’n plek in ons harte gehad. Dean was weer ’n vrolike, besige seuntjie wat altyd geglimlag het.”
Dean se skool, Laerskool Ebenaezer, onthou hom as ’n vriendelike en energieke leerder.
“Hy sal onthou word vir sy vriendelikheid, sy mooi glimlag en sy besondere gees,” het die skool gesê.
Een van sy onderwysers, Chantel Labuschagne, sê Dean was altyd vriendelik en vol lewe.
“Hy het altyd geglimlag en ons op ons tone gehou,” het sy vertel.
Dean se ma, Jackie Duvenage, beskryf hom as ’n gelukkige kind.
“Hy was altyd gelukkig. Ek weet nie hoe anders om dit te sê nie. Hy was net gelukkig,” sê sy.
Volgens Duvenage het Dean van kleins af met ’n ernstige harttoestand saamgeleef en gereeld in die hospitaal beland.
“Hy was ongelooflik sterk,” sê sy.
Ten spyte van sy gesondheidsprobleme was hy baie aktief.
“Hy was altyd aan die beweeg. Wat ek die meeste van hom sal onthou, is sy deursettingsvermoë. Hy het nooit moed opgegee nie.”
Die tragedie het Woensdag begin toe albei kinders siek geword het en hospitaal toe geneem is.
LJ is na die Paardekraal-hospitaal gehaas nadat sy toestand skielik versleg het.
“Sy suurstofvlakke het gevaarlik laag gedaal. Teen die tyd dat ons daar aangekom het, het hy reeds breinfunksie verloor omdat hy te lank sonder genoeg suurstof was,” vertel Barnard.
Dokters het die ouers gewaarsku dat die kans op herstel baie klein was.
Intussen is Dean na die Leratong-hospitaal geneem toe sy toestand ook versleg het.
Albei kinders het behandeling ontvang, maar hul toestande het deur die nag agteruitgegaan.
Donderdagoggend, terwyl Barnard op pad was om sy baba te besoek, het hy die oproep ontvang dat LJ oorlede is.
“Dit het gevoel asof my wêreld inmekaar stort,” sê hy.
“Ek kan nie daardie gevoel beskryf nie. Jy is op pad om jou kind te sien, en dan hoor jy hy is weg.”
Later die dag het hy steeds gehoop dat Dean sou herstel.
“Ek het tyd saam met hom deurgebring, maar die personeel het gesê dinge lyk nie goed nie.”
Daardie aand, omstreeks 20:00, het die familie die nuus ontvang dat Dean ook oorlede is.
Barnard onthou sy oudste seun as ’n liefdevolle, energieke kind met ’n goeie sin vir humor.
“Hy was ’n grapmaker. Hy het daarvan gehou om mense te laat lag.
“Hulle was twee wonderlike kinders. Ons was ’n hegte gesin en baie na aan mekaar.”
Dean sou in November nege jaar oud geword het.
“Hy was ’n karakter op sy eie. Albei my seuns was my bulletjies.
“Ek mis hulle verskriklik en probeer net elke dag deurkom.”
Wat is Shone se kompleks?
Shone se kompleks is ’n seldsame aangebore harttoestand waar verskeie afwykings aan die linkerkant van die hart voorkom. Dit belemmer die normale vloei van bloed deur die hart en liggaam. Kinders met dié toestand is dikwels meer vatbaar vir ernstige komplikasies, insluitend asemhalingsprobleme en longinfeksies.
