Die legendariese Springbok-afrigter Rassie Erasmus is as Afrigter van die Jaar by die SA Rugby-toekennings aangewys. Hy het ook die Springbok-erfenistoekenning ontvang vir sy langtermynbydrae tot die span en die breër rugbylandskap.
Die Springbokspan is ook as Span van die Jaar bekroon.
Die Springbok-haker Malcolm Marx is as SA Rugby se Mansspeler van 2025 aangewys – ’n eer wat hy ook in 2017 ontvang het. Die kragspeler het sterk mededinging van mede-Springbokke en finaliste Pieter-Steph du Toit, Sacha Feinberg-Mngomezulu, Ox Nche en Jasper Wiese uitgestof.
Nadine Roos is vir ’n tweede agtereenvolgende seisoen as SA Rugby se Vrouespeler van die Jaar aangewys.
Die opkomende Bok-ster Ethan Hooker het die toekenning vir SA Rugby se Jong Mansspeler van die Jaar gewen.
Die Springbokke het ook ’n hoogtepuntvideo van die toekenningsgeleentheid op sosiale media gedeel met die opskrif: “Oh, what a night we had in Cape Town!”
Ná die spoggeleentheid het Erasmus, wat bekend is vir sy nederigheid, gesê baie topafrigters en spelers voltooi hul loopbane sonder om ooit ’n formele toekenning te ontvang.
Hy sê mense hou almal van daardie “klop op die skouer”, en dat sulke erkenning ’n mens emosioneel en baie dankbaar maak.
Volgens Erasmus voel hy soms minder senuweeagtig wanneer hy voor 60 000 of 80 000 mense op ’n rugbyveld staan, maar by ’n geleentheid soos dié kan ’n mens meer senuweeagtig raak omdat dit buite jou gemaksone is.
Hy het ook gesê dat dit die span baie trots maak om te hoor hoe die Springbokke volgens gaste en hooggeplaastes by die geleentheid ’n positiewe rol vir die land speel.
Lys van wenners by die SA Rugby-toekennings 2025
SA Rugby Mansspeler van die Jaar: Malcolm Marx
Finaliste: Pieter-Steph du Toit, Sacha Feinberg-Mngomezulu, Ox Nche, Jasper Wiese
SA Rugby Vrouespeler van die Jaar: Nadine Roos
Finaliste: Byrhandré Dolf, Aseza Hele, Libbie Janse van Rensburg, Babalwa Latsha
SA Rugby Jong Mansspeler van die Jaar: Ethan Hooker
Finaliste: Sacha Feinberg-Mngomezulu, Canan Moodie, Haashim Pead, Zachary Porthen
SA Rugby Jong Vrouespeler van die Jaar: Byrhandré Dolf
Finaliste: Patience Mokone, Nombuyekezo Mdliki, Anushka Groenewald
Springbok Mans Sewes-speler van die Jaar: Shilton van Wyk
Finaliste: Selwyn Davids, Impi Visser
Springbok Vroue Sewes-speler van die Jaar: Nadine Roos
Junior Springbokspeler van die Jaar: Haashim Pead
Finaliste: Cheswill Jooste, Riley Norton
Span van die Jaar: Springbokke
Finaliste: Junior Springbokke, Springbok Sewes
Afrigter van die Jaar: Rassie Erasmus (Springbokke)
Finaliste: Swys de Bruin (Springbok Vroue), Kevin Foote (Junior Springbokke), Philip Snyman (Springbok Sewes)
FNB Ondersteuners-oomblik van die Jaar: Die Springbokke se rekordoorwinning oor die All Blacks in Nieu-Seeland
Carling Curriebeker Premierafdeling Speler van die Jaar: Donovan Don (Sanlam Boland Kavaliers)
Finaliste: Gurshwin Wehr (Suzuki Griekwas), George Whitehead (Suzuki Griekwas)
Carling Curriebeker Eerste Afdeling Speler van die Jaar: Andrew Kota (NovaVit Griffons)
Finaliste: Keagan Fortune (Valke), Willem van den Hever (NovaVit Griffons)
Provinsiale Vrouespeler van die Jaar: Patience Mokone (Isuzu Bulls Daisies)
SA Vodacom URC Speler van die Seisoen (verlede jaar aangekondig): Sacha Feinberg-Mngomezulu (DHL Stormers)
OUTsurance Skeidsregter van die Jaar: Aimee Barrett-Theron
Presidentstoekenning: Gavin Varejes
“Spirit of ’95”-toekenning: Siya Kolisi
Springbok-erfenistoekenning: Rassie Erasmus
SA Rugby Geassosieerde Lid van die Jaar: SA Rolstoelrugby.