Yolande Maritz-Fouche sal reeds drie weke in aanhouding wees teen die tyd dat die hof volgende week oor haar aansoek om borgtog beslis. Haar vrylating hang af van die sukses van dié aansoek.
Sy is vroeër skuldig bevind op verskeie ernstige aanklagte, wat die staat se teenkanting teen haar vrylating versterk.
Volgens die staat is Maritz-Fouche ’n vlugrisiko. Aanklaer advokaat Jennifer Cronjé het aangevoer dat niks haar sou verhinder om die land te verlaat en elders weer as vroedvrou te werk nie. Die feit dat sy reeds in 2021 deur die Suid-Afrikaanse Raad vir Verpleging geskors is, tel volgens die staat nie in haar guns nie.
Maritz-Fouche is op 8 April skuldig bevind op 14 aanklagte. Dit sluit onder meer strafbare manslag in ná die dood van ’n pasgebore baba, sowel as aanklagte van aanranding en ander oortredings wat verband hou met onwettige praktyke tydens geboortes. Die hof het bevind dat sy in sekere gevalle hoërisiko-swangerskappe moes verwys het na spesialiste.
Ná haar skuldigbevinding is haar vorige borgtog teruggetrek, waarna sy ’n formele aansoek om nuwe borgtog gebring het.
Tydens haar getuienis het Maritz-Fouche volgehou dat sy nie ’n vlugrisiko is nie. Sy het verduidelik dat sy en haar man tans by ’n vriendin woon en afhanklik is van ander mense vir ondersteuning, aangesien sy nie meer ’n inkomste het nie.
Sy het ook haar betrokkenheid by haar geloofsgemeenskap beklemtoon en gesê sy is aktief betrokke by verskeie gemeenskapsinisiatiewe. Volgens haar probeer sy haar lewe herbou en geestelik groei.
Wat haar reisdokumente betref, het sy erken dat sy oor drie paspoorte beskik, waarvan een verval het. Sy het egter aangevoer dat die nuutste dokument verkry is met die oog op moontlike sendingwerk in die buiteland.
Maritz-Fouche het ontken dat sy ná haar skorsing voortgegaan het met vroedvrouwerk of sonardienste. Sy het getuig dat sy nie meer oor enige toerusting beskik nie en geen inkomste uit sulke aktiwiteite verdien het nie.
Haar man, Paul Fouchee, se gesondheidstoestand is ook as ’n belangrike faktor voorgehou. Hy het volgens haar ernstige rugbeserings opgedoen wat hom grootliks afhanklik maak van haar versorging. Sy het aangevoer dat sy noodsaaklik is vir sy daaglikse sorg.
Die staat het egter dié weergawe betwis en aangevoer dat Paul steeds funksioneel is en ondersteuning van ander ontvang. Daar is ook getuig dat vriende bereid is om finansieel by te dra indien borgtog toegestaan word.
Verder het die staat beweer dat Maritz-Fouche nie ’n vaste adres het nie en dat sy in die verlede verkeerde besonderhede verskaf het. Daar is ook verwys na bewerings dat sy, ten spyte van haar skorsing, weer vroedvroudienste gelewer het.
Die verdediging het op hul beurt aangevoer dat streng borgtogvoorwaardes, insluitend die oorhandiging van haar paspoorte en gereelde aanmelding by die polisie, voldoende sou wees om enige risiko te beperk.
Die staat bly egter by sy standpunt dat sy in aanhouding moet bly tot vonnisoplegging, aangesien geen voorwaardes voldoende sou wees om te keer dat sy moontlik vlug nie.
Die hof se beslissing oor haar borgtogaansoek word volgende week verwag.
