’n Historiese straat wat dateer uit die tyd van Jesus Christus is op 20 Januarie 2026 vir toeriste oopgemaak. Die sogenaamde Pelgrimspad verbind die Siloambad met die tempelterrein in Jerusalem en strek oor sowat 600 meter.
Die pad is oorspronklik in die tyd van koning Herodes die Grote aangelê en later, volgens oorlewering, onder die bewind van Pontius Pilatus voltooi. Argeoloë is oortuig dat dit dieselfde roete is wat pelgrims in Bybelse tye gebruik het om na die tempel op te gaan – en dat Jesus self ook daar geloop het.
Die bestaan van die straat is in 2004 toevallig ontdek toe munisipale werkers ontbied is om ’n gebarste waterpyp te herstel. Wat aanvanklik ’n roetine-werk was, het gelei tot een van die belangrikste argeologiese ontdekkings in Jerusalem in onlangse dekades.
Opgrawings het byna twintig jaar lank voortgeduur. Die pad loop onder ’n oorwegend Palestynse woongebied in oos-Jerusalem, wat die projek kompleks en omstrede gemaak het.
Tydens die opgrawings is verskeie artefakte blootgelê, waaronder ’n Joodse rituele bad (mikwe) en ’n verhoog of podium wat moontlik vir openbare aankondigings of Skriflesings gebruik is. Hierdie vondste werp verdere lig op die godsdienstige en sosiale lewe van Jerusalem in die eerste eeu.
Met die amptelike opening word verwag dat die Pelgrimspad groot belangstelling sal lok. Vir Jode bied dit ’n tasbare verbinding met hul antieke geskiedenis, terwyl baie Christene dit as ’n besondere geleentheid sien om letterlik in die voetspore van Christus te stap.
